Frá árinu 2001 hefur Íþróttabandalag Reykjavíkur gefið kynningarit um íþrótta- og félagsstarf í Reykjavík. Allir nemendur í 1.-10. bekk í grunnskólum Reykjavíkur fá ritið afhent í byrjun september á hverju hausti. Í ritinu er að finna upplýsingar um það helsta sem í boði er hjá íþróttafélögum og félagsmiðstöðvum í Reykjavík. Hér að neðan má sjá kynningarrit síðustu þriggja ára. Smellið á ritið til að skoða það í pdf útgáfu.

Árið 2009 var gerð töluverð breyting frá því sem verið hefur í uppsetningu kynningarritsins. Finna má öll íþróttafélög í Reykjavík í ritinu í stafrófsröð. Hjá hverju félagi koma fram helstu grunnupplýsingar eins og aðsetur, símanúmer, netföng og heimasíður. Þeir sem hafa ákveðna íþróttagrein í huga og vilja vita hvar er hægt að iðka hana geta flett upp á opnu með yfirliti yfir allar þær greinar sem hægt er að iðka í borginni. Þá eru einnig kort af hverfum borgarinnar með upplýsingum um staðsetningu og æfingastaði íþróttafélaganna. Allur almennur texti í ritinu og upptalning á íþróttagreinum er á fjórum tungumálum; íslensku, ensku, pólsku og tælensku.

2010-2011

2009-2010



2008-2009

• Fimleikadeild Ármanns: www.armenningar.is
• Fjölnir: www.fjolnir.is
• Fram: www.fram.is
• Fylkir: www.fylkir.com
• Íþróttafélag fatlaðra Reykjavík: www.ifr.is
• ÍR: www.irsida.is
• KR: www.kr.is/itrottaskoli
• Valur: www.valur.is  
• Víkingur: www.vikingur.is
• Þróttur: www.trottur.is

Af gömlum og góðum íslenskum sið fagnar Íþróttabandalag Reykjavíkur (ÍBR) sumarkomunni í kringum Sumardaginn fyrsta og gefur börnum í grunnskólum Reykjavíkur sumargjafir. Sumargjafaverkefnið hófst árið 2005 þegar nemendur í 2.bekk fengu sippuband. Það hefur síðan verið endurtekið ár hvert og hafa þrír árgangar bæst við í hóp þeirra sem fá sumargjafir frá ÍBR. Tilgangur sumargjafanna er að gleðja reykvísk börn og um leið hvetja þau til að hreyfa sig og leika sér með tilvísun í íþróttir almennt.

Í ár fengu 4079 börn í 39 grunnskólum í Reykjavík gjafir frá ÍBR. Gjöfunum var dreift til skólanna 19.-21.apríl. Börn í öðrum bekk fengu sippuband og börn í þriðja bekk bolta. Fimmtu bekkingar sundkort sem gildir í þrjú skipti í sundlaugar Reykjavíkur. Bæklingar með hugmyndum að leikjum og æfingum fylgdu sippuböndum, boltum og sundkortum. Smellið á bæklingana hér að neðan til að skoða þá nánar. 

Haustið 2009 fengu öll börn í 4.bekk í Reykjavík vetrargjöf frá Íþróttabandalagi Reykjavíkur. Vetrargjöfin var gefin í kringum fyrsta vetrardag en hún var boð á skauta með leigu á skautum og hjálmi innifalið. Boðsmiði á skauta hafði áður verið hluti af sumargjafaverkefni ÍBR. Til að þessi vetrarlega gjöf nýttist betur var ákveðið að gera tilraun með að gefa hana að hausti. Smellið á myndina hér að neðan til að skoða bækling og gjafabréf sem 4.bekkingar fengu afhent. 

Árið 2004 gaf Íþróttabandalag Reykjavíkur út handbók fyrir foreldra sem vilja taka þátt í íþróttastarfi barna sinna ásamt bæklingi um hlutverk foreldra í íþróttastarfi. Markmiðið með handbókinni er að hjálpa foreldrafélögum og hópum sem starfa með íþróttafélögum að koma skipulagi á störf sín og dreifa verkefnum. Í handbókinni eru einnig ýmsar ábendingar til foreldra um hvernig þeir geta stuðlað að bættu íþróttastarfi. Í bæklingnum eru m.a. ábendingar til foreldra um hvernig þeir geta best stutt börn sín í íþróttastarfi. Smellið á myndirnar hér fyrir neðan til að skoða handbókina (blá) og bæklinginn (grænn).

      

Sífellt eru gerðar meiri kröfur um gæði íþróttastarfs fyrir börn og er það af hinu góða. Eina leiðin til að ná fram góðu og barnvænlegu íþróttastarfi er með samstöðu allra sem hlut eiga að máli; íþróttafélaga, þjálfara og foreldra.

ÍBR hefur gefið út sérstakan bækling um barnaíþróttir sem hægt er að nálgast með því að smella á forsíðuna (PDF -188 KB).